Мэҥэ-Алдан нэһилиэгиттэн 12 наука кандидаттара, 4 наука доктардара тахсыбыттара

Россия бэрэсидьиэнэ 2021 сылы наука уонна технология сылынан биллэрбитэ. Онон ити хайысханан Россияҕа уонна өрөспүүбүлүкэҕэ элбэх үлэ ыытылыннаҕа. Бу тиэмэнэн сибээстээн биһиги Мэҥэ-Алдан нэһилиэгиттэн тахсыбыт учуонайдар тустарынан историк, кыраайы үөрэтээччи Николаев Н.С. кинигэтиттэн уонна атын матырыйааллартан билбиппитин билиһиннэрэбит. Мэҥэ-Алдан нэһилиэгиттэн 12 наука кандидаттара, 4 наука доктардара тахсыбыттара.

Наука кандидаттара: историческай наука — Ковлеков Семен Ипатьевич, Николаев Николай Степанович; химическай наука — Николаев Иван Гаврильевич; филологическай наука — Манчурина (Сыромятникова) Лидия Егоровна; медицинскай наука — Комиссаров Анатолий Николаевич, Климова Татьяна Михайловна; биологическай наука — Колодезников Василий Егорович; экономическай наука — Дарбасов Алексей Васильевич, Борисов Константин Афанасьевич; физико-математическай наука — Бочкарев-Иннокентьев Родион Николаевич; техническай наука — Тарасов Петр Петрович; педагогическай наука — Захаров Александр Александрович.

Наука доктордара: техническай наука — Ковлеков Иван Иванович, Лыглаев Александр Васильевич; философскай наука – Луковцев Валентин Степанович; экономическай наука — Дарбасов Василий Романович.

Бу учуонайдартан биһиги оскуолабытыгар элбэхтик сылдьыбыт, научнай-практическай конференцияларга үлэлэспит киһинэн Дарбасов Василий Романович буолар. Кини 1943 сыллаахха олунньу 14 күнүгэр Мэҥэ-Алдаҥҥа төрөөбүт. 1970 сыллаахха Саха государственнай университетын бүтэрбитэ. Идэтинэн учуонай-зоотехник. 1978 сыллаахха «Повышение экономической эффективности табунного коневодства» диэн тиэмэҕэ диссертация көмүскээн экономическай наука кандидата буолбута. 1994 сыллаахха «Экономические основы продуктивного коневодства» диэн докторскай үлэни көмүскээн экономическай наука доктара буолбута. Профессор научнай үлэнэн дьарыктаныаҕыттан 30-ча кинигэни, пособиелары брошюралары уонна 300–тэн тахса научнай үлэлэри суруйбута. “Аграрная экономика Севера” диэн кинигэтэ “Лучшая научная книга” Россия конкурсун лауреата буолбута. Василий Романович Саха Республикатын аграрнай политикатын нормативнай аактарын оҥорсубута. Кини тыа сирин сайдыытыгар өҥөтө улахан. 2021 cыл тохсунньу 9 күнүгэр ыарахан ыарыыттан күн сириттэн барбыта.


Нэһилиэкпититтэн өссө да учуонайдар тахсыахтара уонна дойдубут сайдыытыгар үлэлиэхтэрэ диэн эрэнэбит.
📝Тарасова Аделина, Мэҥэ-Алдан оскуолата, 8 кылаас.