Республиканскай «Неймохов ааҕыылара» научнай-практическай конференция

Биир дойдулаахпыт, саха норуодунай суруйааччыта, Саха Өрөспүүбүлүкэтин култууратын үтүөлээх үлэһитэ, Платон Алексеевич Ойуунускай аатынан, Саха комсомолун лауреаттара, Томпо оройуонун уонна Мэҥэ-Алдан ытык олохтооҕо Егор Петрович Неймохов 1950 сыллаахха кулун тутар 30 күнүгэр Таатта, билиҥҥитэ Томпо оройуонугар Мэҥэ-Алдаҥҥа төрөөбүтэ. 2020 сыллаахха Егор Петрович Неймохов үбүлүөйдээх 70 сааһын туолуохтааҕа.
Егор Петрович Неймохов аатынан Мэҥэ-Алдан орто оскуолатыгар саас ыытыллыахтаах тэрээһини (пандемиянан сибээстээн) бу күннэргэ ыыттыбыт.
Быйылгы үбүлүөйдээх бэһис республиканскай «Неймохов ааҕыылара» научнай-практическай конференция кэтэхтэн ыытылынна. Норуодунай суруйааччы олоҕун, айар үлэтин, суруйбут айымньыларын сырдатар барыта 23 оҕо дакылаакка, 45 оҕо уруһуйга кытынна. 2 үлэ видеонан киирбит. Учууталлар ыыппыт уруоктарын, кылаас чаастарын сценарийдарынан эмиэ кыттыыны ыллылар. Секцияларынан арааран оҕолор суруйбут, чинчийбит дакылааттарын, уруһуйдарын анал хамыыһыйа бэрэбиэркэлээтэ.
Саха тылын уонна литературатын учуутала Григорьева Екатерина Егоровна 5-11 кылаастарга Е.П. Неймохов суруйбут айымньыларынан интэриэһинэй уруоктары ыытта. 5-6 кылаастарга «Миша кэпсээннэриттэн», «Суолга» кэпсээннэри аахтылар, ырыттылар. 7 кылаастар «Хаһыы», Сайыҥҥы киэһэ» кэпсээннэри аахтылар, бэйэлэрин санааларын атастастылар. 8 кылааска «Сайсары күөлгэ түбэлтэ» уус-уран киинэни көрдүлэр, «Суолга» диэн кэпсээни аахтылар, ыйытыыларга хоруйдаатылар. 9 кылааска «Хаһыы», «Сайыҥҥы киэһэ» кэпсээннэри аахтылар, былаан оҥорон кэпсээтилэр. 5-9 кылаастар суруйааччы кэпсээннэрин ааҕан баран уруһуйдаатылар. 10 кылаастар «Ильмень үрдүнэн туруйалар» уус-уран киинэни көрдүлэр. 11 кылаастар «Сайсары күөлгэ түбэлтэ» уус-уран киинэни көрдүлэр уонна «Суолга» кэпсээни аахтылар, ырыттылар.
5 кылааска учуутал Аммосова Анна Анатольевна английскай уруогун ыытта. Уруок тиэмэтэ: «Егор Петрович Неймохов олоҕо уонна айымньылара». Оҕолор суруйааччы олоҕун уонна айымньылар ааттарын английскайдыы тылбаастаатылар. 10 -11 кылаастарга суруйааччы Егор Петрович Неймохов олоҕун, айымньыларын уонна наҕараадаларын интернет ситимиттэн «Википедияттан» английскайдыы тылбаастаан, оҕолор элбэҕи биллилэр, интэриэһиргээтилэр.
9 кылааска учуутал Бурцева Виктория Владимировна английскай уруогун ыытта. Бу уруокка оҕолор Егор Петрович Неймохов «Мишкины рассказы» кэпсээнин аахтылар уонна английскайдыы тылбаастаатылар. 6 кылааска Ковлекова Зинаида Ивановна география уруогун Егор Петрович Неймохов «Барыта миэнэ» диэн кэпсээнигэр олоҕуран «Күөллэр» диэн тематтан саҕалаата. Бу уруокка кэпсээҥҥэ суруллубут «Өксүүкэй», «Сиибиктэлээх», «Тураҥнаах», «Ытык Тириитэ», «Аттаахаан» күөллэр ханан сыталларын, төһө улаханнарын, уулара хайдаҕын быһаардылар. Суруйааччы кыра сылдьан чэбдик салгыны түөһүн муҥунан эҕирийэн баран «Барыта миэнэ» диэн, үөрүүтүттэн сүүрэ турбутун оҕолор харахтарыгар ойуулаан көрдүлэр. Түмүккэ бу күөллэри харыстыахха, уулара куруук ыраас буоларын ситиһиэххэ, көрө сылдьыахха диэн оҕолор санааларын эттилэр.
Төрүт култуура учуутала Ефимова Парасковья Сидоровна 6 кылааска ыыппыт уруогар «Оҕо сааһым түгэннэрэ» кэпсээни аахтылар. Уруок олус сэргэхтик ааста. Оҕолор суруйааччы олоҕун, айымньыларын, геройдарын сүрдээҕин билэллэр эбит.
Биһиги ыытар тэрээһиммитигэр актыыбынайдык кыттыбыт бары оҕолорго, кинилэр салайааччыларыгар, дакылаакка кыттыбыт учууталларга улаханнык махтанабыт уонна ситиһиилэри баҕарабыт.

📝Вера Павлова
🎥Аммосова А. А