Россияҕа биллибэт саллаат күнэ

2014 сылтан ахсынньы 3 күнүгэр Россияҕа биллибэт саллаат күнэ бэлиэтэнэр буолбута. Бу күн биһиги дойдубутун көмүскүү сылдьан сэриигэ сураҕа суох сүппүттэри кэриэстиибит. Е.П.Неймохов аатынан Мэҥэ-Алдан орто оскуолатыгар бу күҥҥэ анаммыт кэккэ тэрээһиннэр ыытылыннылар.
1-11 кылаастарга «Биллибэт саллаат күнэ» кылаас чаастарын кылаас салайааччылара ыыттылар. Эбиэттэн киэһэ 7-11 кылаастарга байыаннай эстафета күрэхтэһиитин ОБЖ учуутала Васильев С.В уонна физкультура учууталлара Гоголев Г.С., Филатов П.С. тэрийдилэр. Кылаастан 1 кыыс уонна 3 уол кытыннылар. Хас биирдии хамаанда аат уонна девиз толкуйдаата. Күрэхтэһии көрүҥнэрэ: мэһэйдээх сүүрүү, АК 74 автомат сааны ыһыы уонна хомуйуу, маллаах дьааһыгы аҕалыы, противогазтаах сүүрүү, гранатаны быраҕыы, ОЗК химическэй көстүүмү кэтэн сүүрүү, бааһырбыт байыаһы сүгэн аҕалыы. 11 кылаастар эрэллээхтик бастаатылар уонна көһөрүллэ сылдьар кубогынан, грамотанан наҕараадаланнылар. Иккис миэстэҕэ 10, үһүс миэстэҕэ 8 кылаастар таҕыстылар, кинилэр эмиэ грамота туттулар. 9 кылаастар»За командный дух», 7 кылаастар «За волю к победе»номинациялары ыллылар. Олус солун күрэхтэһии буолан ааста. 10-11 кылаастар Ковлекова З.И. салайыытынан сэрии бэтэрээннэригэр аналлаах пааматынньыктар хаардарын ыраастаатылар. Сэриигэ өлбүттэргэ уонна бэтэрээннэргэ сүгүрүйэбит, ытыктыыбыт, махтанабыт.
📝Вера Павлова
🎥Аммосова А. А.